KORONADAL CITY – Ginapangita na subong ang suspek sa nagluntad nga pagpangluthang patay sa isa ka lalaki sa banwa sang Lake Sebu, South Cotabato.
Ini makaligad nga ginbawian sang kabuhi ang biktima nga ginkilala kay Jelsen R. Canja, 53-anyos, mangunguma nga residente sang Sitio Boto Lewel, Barangay Tasiman sa nasambit nga banwa.
Suno kay SPO4 Bertito Acuyong sang Lake Sebu PNP, ginreport sa police station ni Barangay Kagawad Manda Leysa sang Barangay Tasiman ang hitabo rason nga gilayon nagresponder ang kapulisan.
Sa panaysayon ni Karen Ann Kala, live in partner sang biktima, temprano pa nga nagpadulong sa uma si Canja agud nga magtrabaho sa banana kag rubber plantation nga yara lamang sa likod sang ila ginapuy-an.
Pagkaligad sang isa ka oras, nakabati na suno pa sang mabaskog nga lupok si Karen rason nga ginpadulungan niya ang iya karelasyon kag naabtan ini nga duguan bangud sa igo sang bala sa iya dughan kag liog.
Nakita man sini ang suspek nga si Romeo Nalon Lumbay, 40, nga residente man sang nasambit nga lugar nga armado sang 12 gauge homemade shotgun kag binangon.
Ginpahog pa ni Lumbay si Karen Ann nga patyon sa tion nga magpanugid ini sa mga otoridad.
Gilayon nga nagpalagyo ang suspek sa wala mahibaluan nga direksiyon.
Sa subong, personal grudge kag love triangle ang anggulo nga ginatutukan sang mga otoridad sa natabo nga krimen.
Nahibalyan nga anay live-in partner ni Karen Ann ang suspek antes sila nakaangkon sang relasyon sang biktima.
