KORONADAL CITY- Ginbatak na sa high alert status ang syudad sang Koronadal kasunod sang baton nga terror threat halin sa ISI-MAUTE terror group sa syudad kag kasunod man sang pagsunka ni South Cotabato TESDA Director Talib Bayabao nga gina-alegar nga supporter, member, courier kag financier suno pa sang terorista nga grupo kaangot sang ginpagwa nga arrest order ni Martial Law administrator Defense Sec. Delfin Lorenzana.
Bangud sini, gilayon nga nagpatawag sang pagsinapol si Koronadal City Mayor Peter Miguel kaupod ang mga lokal nga opisyal sang syudad sang Koronadal City PNP agud pahugtan pa ang seguridad kag ipatuman ang NO ID NO Entry.
Bangud sini natalana nga ipatuman ang curfew hour sa bug-os nga syudad kag lockdown sa mga border sang Koronadal agud nga mabantayan ang pagsulod kag pagawas sa syudad.
Kasunod sini ginalauman nga igapatuman man ang curfew sa bug-os ng probinsya sang South Cotabato makaligad ginkumpirma ni Sultan Kudarat Police Provincial Director Senior Supt. Raul Supiter nga may on-going military operation sa pila ka banwa sang Sultan Kudarat nga ginapatihan nga may presensya sang Maute terrorist nga kalapit lang sang South Cotabato.
