KORONADAL CITY- Boluntaryo nga nagsungka si TESDA South Cotabato Provincial Director Engr. Talib Bayabao sa mga otoridad matapos nga isa ang pangalan niya sa mga nalamita sa Maute terror group sa Marawi City.
Sa interbyu sang Bombo Radyo Koronadal kay Bayabao, boluntaryo siya nga nagsungka makaligad nga gin-akusaran na siya nga courier-financier sang terorista nga grupo.
Ginpahayag ni Bayabao nga ginkakibot sini ang nasambit nga impormasyon matapos nga yara sa arrest order list ang iya nga pangalan nga may kahilabtanan sa Maute nga hugot naman sini nga ginpanginwala.
Nabalaka naman ini sa iya nga kabuhi matapos naguwa ang nasambit nga balita.
Nahibaluan nga si Bayabao ang ginaangot sa gin-arestar nga si anay Marawi City Mayor Fahad Salic nga imbulbado man sa nagakatabo nga rebelyon sa Marawi City kun diin anay nagserbe si Bayabao sa talatapan sang anay alkalde.
Sa subong yara na sa kustodiya sang South Cotabato PNP ang nasambit nga opisyal samtang ginahulat pa ang mangin resulta sang imbestigasyon sa pagkaimplikar sini sa Maute terror group.
