KORONADAL CITY – Ginlunsar na ang joint force operation sang PNP kag militar batuk sa Maute inspired group nga nagapanago suno pa sa isa ka hilit kag nabukid nga bahin sa probinsiya sang Sultan Kudarat.
Ini ang ginpahayag ni Police Provincial Director Pol. Senior Supt. Raul Supiter sa interbyu sang Bombo Radyo Koronadal.
Suno kay Supiter, padayon sa gihapon ang beripikasyon nga ila nga ginahimo kun matuod nga ISIS-Maute sympathizers ang mga ini kasubong sang una nga report nga ila nabaton.
Madumduman nga ginkumpirmar mismo ni Sultan Kudarat Governor Pax Mangudadatu kag amo man ang chairman sang Regional Peace and Order Council (RPOC) sang region 12 nga may presensiya sang mga armado nga ginapatihan Maute inspired group sa probinsiya nga ginatutukan sang mga otoridad nga luyag sundon ang ginhimo sang ISIS agud nga kilalahon ang ila nga grupo.
Apang, nagpamalibad anay si Supiter nga ipahayag ang lugar kun sa diin nagakuta ang mga ini.
Aminado ang opisyal nga nagtuga sang kahadlok sa mga residente sa probinsiya ang report nga luyag sundon ang grupo sang Maute nga nagtuga sang kalakasan sa siyudad sang Marawi.
Kaangot sini, ginhingyo sang opisyal ang kooperasyon sang mga pumuluyo agud nga mapunggan ang grupo sa anuman nga kalakasan nga plano nga ilunsar sang mga ini.
Ginpasiguro man sini nga indi matabo sa Sultan Kudarat ang kasamtangan nga nagakatabo nga Marawi siege.
