KORONADAL CITY- Naglab-ot sa 6 ka matag-as nga kalibre sang armas luthang, mga bala, kagamitan sa paghimo sang bomba kag mga eksplosibo ang ginsurrender sang 7 ka mga myembro sang NPA Guerilla Front 73 kadungan sang ila pagsungka sa Sultan Kudarat PNP.
Sa ekslusibo nga interbyu sang Bombo Radyo Koronadal kay Kumander Dindo, halin sila sa Brgy. Midtungok Sen. Ninoy Aquino Sultan Kudarat kun sa diin may kadugayon naman nga nagapakig gyera sa tropa sang gobyerno.
Dugang pa sini nga nahuna-hunaan nila nga magbalik sa gobyerno agud magpangabuhi sang normal kag malinong ilabi na nga wala sang may natuman sa mga ginpromisa sang mga lider sang NPA nga mahatagan sila sang maayo nga bwas damlag kag mabuligan sa problema nila sa pakigbato sa ila kinamatarong sa ancestral domain sang mga Manobo.
Sa subong yara na sa kustodiya sang Sultan Kudarat PNP ang nasambit nga myembro sang NPA kun sa diin suno kay Sultan Kudarat Police Director Sen. Supt. Raul Supiter, igapaidalom ang mga ini sa profiling kag natalana nga iprisentar kay Gov. Pax Mangudadatu agud mahatagan sang bulig sang gobyerno.
