KORONADAL CITY – Naglab-ot sa masobra isa ka libo nga mga sibilyan ang apektado sa subong sang nagapadayon nga engkwentro sa tunga sang mga suldado kag Bangsamoro Islamic Freedom Fighters (BIFF) sa tatlo ka banwa sa probinsiya sang Maguindanao.
Ginpahayag ni Capt. Arvin Encinas, public affairs chief sang 6th Infantry Division Phil.Army, indi mag-untat ang military operation batuk sa mga BIFF nga nagapanago sa mga banwa sang Datu Saidona Mustapha, Datu Saudi Ampatuan kag Shariff Aguak sa probinsiya sang Maguindanao
Bangud sa kahadlok sang mga residente rason nga nagbakwit ang mga ini kag nagdayon na subong sa mas luwas nga lugar malayo sa ila nga mga puluy-an.
Aminado si Encinas nga tensiyunado sa gihapon ang lugar bangud sa nagapadayon pa ang paglagas sa mga BIFF kag wala pa matapos ang ginahimo nga clearing operation sang mga suldado.
Madumduman nga duha ka mga suldado ang napilasan sa engkwentro matapos nga maigo sang bala gikan sa mga snipers sang BIFF.
Sa subong, nagpanghatag na sang bulig ang DSWD-ARMM sa mga apektado nga residente nga nagbakwit sa kahadlok nga malamita sa engkwentro.
Apang, gindula sang militar ang kabalaka sang mga ini nga mangin kasubong sa Marawi City ang hitabo sa ila nga lugar.
Madumduman nga una na nga ginpahayag ni Encinas nga nagapatigayon sang pag-atake ang BIFF bangud luyag sang mga ini nga kilalahon man sang terorista nga ISIS.
