KORONADAL CITY- Malain sa gihapon ang buot sang iloy ni Private First Class Mark Darell Parba makaligad ang nadangtan sang iya bata sa kamot sang mga terorista nga Maute sa Marawi City.
Sa interbyu sang Bombo Radyo Koronadal kay Ginang Merlyn Parba, lab-as pa sa ila panghuna-huna ang ulihi nga pag-istoryahanay nila nga nagapahayag indi ini magkabalaka sa iya bangud yara siya sa maayo nga sitwasyon.
Sa subong ang laragway na lamang sang bata sini ang iya ginahakos bangud indi niya sarang nga lantawon ini sa sulod sang lungon.
Dugang pa sini nga sa subong wala na sang bread winner ang ila nga pamilya, nagakabalaka naman ini sa mga utod sang iya bata nga ginasuportahan sini.
Kaangot sini, nagpanawagan ang pamilya Parba sang bulig sa gobyerno bangud pigado lamang sila kag ang bata nga suldado lamang ang ila ginalauman.
Suno pa kay Ginang Merlyn wala na sila sang may mahimo pa kundi batunon ang kamatayon sang iya bata nga nakigbato para sa pungsod.
Madumduman nga sang nagligad lamang nga adlaw, nag-abot sa Brgy. Carpenter hill siyudad sang Koronadal ang bangkay sang 22 anyos nga suldado.
