KORONADAL CITY – Nagakasubo subong ang pamilya sang 22-anyos nga suldado nga kalakip sa napatay sa Marawi siege matapos nga nag-abot na sa siyudad sang Koronadal ang bangkay sini.
Sa eksklusibo nga interbyu sang Bombo Radyo Koronadal kay Gng. Merlyn Parba, ina ni PFC Mark Darrel Parba, indi nila mapaathag ang sakit nga nabatyagan bangud sa kamatayon sang ila bata.
Suno kay Ginang Parba, napatay nga baganihan sa bata nga edad si Mark bangud sa pagserbe sa pungsod kag wala nila ginalauman nga sa iya pagpauli, bangkay na ini.
Ginpahayag pa sini nga tuman ka sakit sa subong ang ila nabatyagan rason nga wala pa sila sang plano kun san-o ini ilubong.
Dugang pa niya, wala nila ginalauman nga mangin kasubong sini ang kapalaran ni PFC Mark nga bag-o pa lamang sa serbisyo bangud madamo pa ini sang handum sa kabuhi.
Hingyo naman sang pamilya sini nga mapulbos kag maubos na ang Maute terror group kag matapos naman ang engkwentro sa Marawi agud mahatagan sang hustisya ang kamatayon sini kag sang iya mga kaupdanan.
Madumduman nga napatay si PFC Parba sang nagligad nga Hunyo 8, 2017 bangud sa igo sang RPG sa tunga sang kinagamo sa Marawi City.
