KORONADAL CITY – Naglab-ot sa P120K ang damyos nga ginbilin sang pagkasunog sang tatlo ka puluy-an sa Rigor Compound, Purok Kaunlaran, Barangay General Paulino Santos, Koronadal City.
Ini ang base sa inisyal nga pagbulubanta sang Koronadal City Fire Station.
Madumduman nga pasado alas-4:00 kahapon sang hapon sang magsugod ang sunog nga gilayon naman naresponderan sang tatlo ka fire truck kag nadeklarar nga fire-out alas 4:42 sang hapon.
Sa interbyu sang Bombo Radyo Koronadal kay Mila Mateo Muega, isa sa tag-iya sang puluy-an, nakibot na lamang sila sang nagsugod na sa pagdako ang kalayo kag nasunog na ang puluy-an sang Pamilya Rigor kag pamilya Aglibot.
Madasig nga naglapta ang kalayo kag bangud hinimo sa light materials ang una nga puluy-an nga ginhalinan sang kalayo.
Nagpasalamat naman si Muega bangud wala tigayon nga maabo ang ila nga puluy-an.
Magluwas sini, slightly damaged man ang nalikod nga bahin sang simbahan nga yara man nahamtang sa nasambit nga compound.
Sa inisyal nga imbestigasyon sang BFP Koronadal, nagikan ang kalayo sa kuwarto sang pamilya Rigor bangud sa kalan nga may nakisindi nga uling.
Maayo na lamang kag wala sang may napilasan ukon napatay sa nagluntad nga sunog.
