KORONADAL CITY– Ginkumpirma ni Brgy. Kablon Tupi South Cotabato kapitan Usting Tilo ang impormasyon kaangot sa nasiplatan nga mga armado nga kalalakihan nga nag agi sa ila barangay.
Sa interbyu sang Bombo Radyo Koronadal kay Kapitan Tilo, nagluntad ang insidente sa tunga sang mabaskog nga pag-ulan sang nakaligad nga gab-i kun sa diin isa ka pamilya ang nagreporr sa ila nga may yara sang 10 ka mga kalalakihan ang nakisilong sa ila puluy-an nga may dala nga mga matag-as nga kalibre sang armas luthang.
Dugang pa sini nga nakabonnet man ang mga armado nga lalaki kun sa diin naghingyo ang mga ini nga magapasilong anay sa puluy-an ni Mr. Doming Dawang samtang mabaskog pa ang pagbubo sang ulan.
Ginkahadlok suno pa ini sang ila pamilya kag nakakas lamang sang naghalin na ang mga ini nga wala sila ginsakit.
Samtang ginasiling naman nga nagpadulong sa banwa sang Tampakan ang mga armado nga kalalakihan.
Kaangot sini ginpabulaanan ni South Cotabato Police Provincial Director Senior Superintendent Franklin Alvero nga ginharass ang mga residente sang Brgy. Kablon Tupi South Cotabato sang mga armado nga kalalakihan nga nagsulod sa nasambit nga barangay.
Ginpahayag ni Col. Alvero nga dako ang posibilidad nga myembro lang ini sang rebelde nga New People’s Army kag indi halin sa anuman nga terorista nga grupo kasubong sang Maute.
Samtang ginpasiguro naman ni Col. Alvero nga nakamonitor ang South Cotabato PNP kag ang 27th IB Philippine Army sa bug-os nga banwa sang probinsya agud ipasiguro ang seguridad sang mga pumuluyo.
