KORONADAL CITY – Lubos ang pagpasalamat sang mga bakwit gikan sa Marawi City nga magsaylo sa siyudad sang Korondal kag diri na plano nga magpuyo makaligad ang mainit nga pagbaton sang Barangay Officials kag Department of Education.
Sa eksklusibo nga interbyu sang Bombo Radyo Koronadal kay Gng. Salamona Ibrahim, retired employee sang NTC-12 nga taga Barangay Kilala, Marawi City, nagdesisyon sila nga magpamilya nga magpuyo na sa siyudad sang Koronadal bangud sa kinagamo nga nagluntad sa Marawi kag aminado siya nga madugay pa antes nga makabangon ang ila nga lugar.
Matapos man suno pa ang giyera, mabudlay para sa mga taga-Marawi nga magsugod labi na nga wasak na ang ila mga puluy-an kag pangabuhian.
Bangud sini, nadesisyunan man ni Ibrahim nga i-enroll ang mga bata sa Koronadal National Comprehensive High School (KNCHS) agud nga makapadayon sa pagtuon ang mga bata sini.
Gilayon naman nga ginbaton sang pamunuan sang KNCHS ang mga bata ni Ibrahim kaupod ang iban pa nga mga estudyante gikan sa Marawi City.
Suno kay Valentin Dignadice, principal sang KNCHS, may standing order na gikan sa DepED-12 nga i-accommodate nila ang mga transferees gikan sa Marawi City apisar nga wala sang nagakaigo nga dokumento, apan kinahanglan lamang nga may magatindog nga guardian ang mga estudyante.
Lauman pa nga madugangan ang numero sang mga transferees gikan sa Marawi tubtob sa madason nga semana.
Sa subong yara sa 13 ka mga estudyante gikan sa Marawi City ang naka-enroll sa KNCHS samtang ginahibalo pa ang numero gikan sa nagkalain-lain nga buluthuan sa siyudad sang Koronadal matapos nga mareport ang pagcourtesy call sang mga taga-Marawi sa mga Barangay officials agud nga maghingyo sang pahanugot sa ila nga pagpuyo sa siyudad.
