KORONADAL CITY – Personal nga nagpadala sang sulat sa mga punong barangay sa nagkalain-lain nga barangay sa siyudad sang Koronadal si PNP South Cotabato Police Director P/Ssupt. Franklin Alvero agud nga imandu ang pagpatigayon sang barangay profiling angot sa report nga madamo sang mga evacuees gikan sa Marawi City ang nagsaylo sa siyudad.
Sa interbyu sang Bombo Radyo Koronadal kay Alvero, ginpahayag sini nga tinutuyo nila sa pagpatigayon sang barangay profiling nga mamonitor ang mga indibidwal nga nagsaylo sa siyudad gikan sa Marawi City agud nga mabuligan sa DSWD-South Cotabato kag ma-assist ang mga ini labi na sa ila nga pangkabuhian kag pagtuon sang ila mga bata.
Kaangot sini, ginkumpirmar ni Barangay Chairman Margie Subaldo sang Barangay GPS, Koronadal City nga may masobra 20 ka mga indibidwal gikan sa Marawi City nga nag-courtesy call sa iya makaligad nga magsaylo sa nasambit nga lugar.
Nahibaluan nga ang nasambit nga mga indibidwal ang mga residente sang Marawi nga nagbakwit sa ila lugar sa tinutuyo nga makapangabuhi sang matawhay sa tagsa nila ka mga himata.
Kaupod sang mga ini ang mga estudyante nga naka-enroll na sa Marbel 1 Elementary School.
Sa subong, yara na sa Purok Magsaysay kag Purok Kings nagapuyo ang mga evacuees gikan sa Marawi City.
