KORONADAL CITY- Kaupod na sa subong sang tagsa nila ka pamilya diri sa siyudad sang Koronadal ang yara sa 9 ka mga construction workers nga kalakip sa mga survivors sang Marawi siege matapos nga makaluwas sa kamot sang Maute terror group paagi sa paglangoy sa suba.
Sa interbyu sang Bombo Radyo Koronadal kay CSWDO Mary Jane Gabucan, ginsugat nila sa Iligan City kaupod ang rescue team gikan sa City government ang mga biktima kag luwas na nga nakapauli sa siyudad sang Koronadal.
Suno kay Gabucan, una nga adlaw pa lamang sang Marawi crisis sang napahibalo na ini sa city government paagi sa ila nga mga himata gikan sa Urban 2, Barangay San Isidro, Koronadal City.
Gilayon naman nga naghimo sang paagi ang City government agud mabuigan ang mga ini.
Nahibaluan nga ginhimo nga kuta sang Maute terrorist ang ginadayunan nga puluy-an sang mga biktima kun diin kalakip man sa naka -pwesto ang mga sniper sang Maute batuk sa militar.
Sa panaysayon pa sang mga ini, wala gilayon sila nakaguwa bangud sa delikado tuga sang asod-asod nga nilupok kag paghulog sang bomba gikan sa fighter jets.
Nagpangisog suno pa sila nga magpalagyo paagi sa paglangoy sa suba sang makapangita sang tsansa sang naghinay ang nilukpanay sa lugar.
Gilayon naman nga nabuligan ang mga biktima sang mga barangay officials kag nadala sa Iligan City.
Sa subong lubos ang pagpasalamat sang mga ini nga nakapauli pa nga luwas sa ila nga pamilya.
Natalana naman sila nga buligan sang city government matapos ang trauma nga naeksperiensiyahan sang mga ini.
