KORONADAL CITY – Nagapadayon sa subong ang imbestigasyon sang mga otoridad sa mga Indonesian nationals nga nakasulod sa Saranggani province nga wala sang nagakaigo nga dokumento sakay sang bangka.
Ini ang ginkumpirmar ni Police Superintendent Romeo Galgo, PRO-12 Public Information Officer sa interbyu sang Bombo Radyo Koronadal.
Suno kay Galgo, ginpaidalom na sa interogasyon ang mga foreigners makaligad nga madakpan ang mga ini kag wala sang may mapakita nga mga dokumento.
Apang, ginpanginwala ni Galgo nga armado ang nasambit nga mga Indonesian nationals.
Kaangot sini, hugot nga crackdown batuk sa mga foreigners ang ginahimo sa subong sang Region 12 agud masiguro nga wala sang mga terorista nga makasulod sa rehiyon samtang ginaimplementar ang Martial law.
Kasdungan sini, ginmandu man sang PNP-12 Regional director ang hugot nga monitoring sa mga checkpoint kag gindoble ang pagpatrolya sa mga strategic areas, place of convergence kag mga lugar nga ginadagsa sang tawo.
Gin-awhag man sang kapulisan ang mga pumuluyo nga magbulig sa ila agud nga malikawan ang anuman nga kalakasan sa rehiyon.
