KORONADAL CITY – Nakaangkon na sang problema ang Muslim community sa pila ka bahin sang Mindanao kasubong sang Sultan Kudarat, North Cotabato kag Maguindanao sa ila nga obserbasyon sang Holy Month of Ramadan angot gihapon sa nagapadayon nga Martial law sa rehiyon.
Sa interbyu sang Bombo Radyo Koronadal kay South Cotabato Provincial Muslim Affairs Chairman Sultan Mutalib Sambutu, nakabaton ini sang report gikan sa mga kaupdanan nga Muslim leaders kun diin ginapangatubang sang mga ini sa subong ang problema sa ginapatuman nga curfew sa ila nga mga lugar.
Nagapangduha-duha man sila nga magpadulong sa mga moske bangud sa kahadlok nga madakpan sa ginapatuman nga curfew rason nga mas manubo nga numero sang mga Muslim ang nagasimba sa kaagahon agud nga magpangamuyo.
Kaangot sini, mabudlay para sa ila ang sitwasyon bangud nga imposible suno pa nga bag-uhon ang ila nakaandan na nga tradisyon rason nga nagalaum sila nga makaangkon sang konsiderasyon ang gobyerno kag mga otoridad sa ila.
Nahibaluan nga ang Ramadan ang ika-siyam nga bulan sa Islamic Calendar kun diin ginaobserbar ang pagpuasa kag pagpangamuyo .
