KORONADAL CITY – Yara na sa kustodiya subong sang mga otoridad ang maglive-in partner matapos madakpan sa ginpatigayon nga operasyon sang Philippine Drug Enforcement Agency (PDEA) Regional Office XII sa Purok Morillo, Barangay Sta. Cruz, Koronadal City.
Ginkilala ni Kat Abad, spokesperson sang PDEA-12 ang mga naarestar nga sanday Rey E. Donasco, 38, isa ka ex-army nga residente sang Bo. 9, Purok Malaya, Banga, South Cotabato kag ang karelasyon sini nga si Hernalee V. Abadonio alyas Darlene, 30, nga residente sang Bo. 4, Rang-ay, Banga, South Cotabato.
Suno kay Abad, una na nga nadakpan sa separar nga operasyon ang duha kag napreso apang nakapiyansa rason nga liwat nga nagbalik sa pagduso sang droga.
Nakuha sa posisyon sang mga ini ang 2 large sachet, four medium sachet kag 1 heat-sealed transparent plastic sachet sang ginapatihan nga shabu nga yara sa 100 gramo nga nagakantidad sang nagalab-ot sa P850,000.00 kag nagkalain-lain nga mga drug paraphernalia.
Ang duha ka mga suspek ang yara man sa watch-listed drug personalities sang PDEA-12.
Nahibaluan nga nagakuha sang droga sa Talitay, Maguindanao ang magkarelasyon kag ginabaligya sa siyudad sang Koronadal, General Santos City kag Sarangani.
