KORONADAL CITY – Malinong kag matawhay ang una nga adlaw sang pagsugod sang Ramadan sa bug-os nga probinsiya sang Maguindanao kadungan sang implementasyon sang Martial Law.
Ini ang ginpahayag ni Mayor Zam Ampatuan sang Rajah Buayan, Maguindanao sa interbyu sang Bombo Radyo Koronadal.
Suno kay Mayor Ampatuan, wala sang pagbag-o sa ginapatigayon nga pagpuasa kag pagpangamuyo sang mga Muslim bangud naanad na sila nga wala nagapagab-i sa dalan ukon nagapatigayon sang mga kasadyahan sa isa ka bulan nga Ramadan.
Antes pa man ang alas-10 sang gab-i nga curfew hour, tapos naman sila sa pagpangamuyo sa mga mosque kag nagapauli na sa ila nga mga puluy-an.
Dugang pa sini nga suportado naman sang mga Muslim sa Mindanao ang gindeklarar nga Martial law ni Pangulong Rodrigo Duterte bangud nagapati sila nga para ini sa pagkab-ot sang kalinong sa Mindanao.
Wala suno pa sang mangin problema sa mga Muslim bangud magasunod sila sa layi kag indi maghimo sang anuman nga kalakasan labi na subong nga Ramadan nga ang tinutuyo magbag-o kag maghingyo sang pasaylo sa ila mga sala.
Nasubuan man sila sa natabo nga Marawi siege kag pangamuyo nila nga matapos na ang kinagamo.
Nagapanawagan man ini sa mga utod nga Muslim nga magbulig sa mga otoridad agud nga madakpan ang mga terorista sa Mindanao.
