KORONADAL CITY- Mas gindoble pa sang South Cotabato PNP ang ila intelligence gathering kaangot sa impormasyon nga posible nga pakig-alyansa sang Bangsamoro Islamic Freedom Fighters (BIFF) kag iban pa nga rebelde nga grupo kasubong sang New People’s Army sa ISIS linked terrorist group nga Maute.
Suno kay South Cotabato Police Provincial Director Senior Superintendent Franklin Alvero, nakatutok sila subong sa pagpahugot sang seguridad agud indi makasulod sa South Cotabato ang terorista nga grupo.
Samtang kaangot sa pagpaidalom sang Mindanao sa Martial law , ginpahugtan man sang 27th IB Phil. Army ang ila military checkpoints pasulod kag pagwa sa probinsya samtang ginbatak naman ang alerto sa Rehiyon 12 makaligad ang naglunta nga 2 ka insidente sang pagpamomba sa syudad sang Kidapawan sang nakaligad nga adlaw sang byernes.
Kaangot sini, nagpahanumdum naman ang mga otoridad nga likawan ang pagpalapta sang mga unverified report angot sa pagsinapol suno pa sang 7 ka mga lider sang terorista nga grupo sang ASG kag Maute nga may tinutuyo nga magpalapta sang kinagamo sa mga nagapanguna nga syudad sa Rehiyon 12.
