KORONADAL CITY – Nabalaka sa kaluwasan ni Father Teresito “Chito” Suganob ang pamilya sini sa banwa sang Norala, South Cotabato matapos naguwa ang balita angot sa pagkahostage suno pa sini sang Maute terror group sa siyudad sang Marawi.
Sa interbyu sang Bombo Radyo Koronadal kay Boyet Suganob, wala na nila naistorya pa ukon nakontak man lamang sa cellphone si Father Chito rason nga nabalaka ini sa ila nga sitwasyon sa subong.
Suno pa kay Suganob,ginkumpirmar naman sa ila gikan sa Catholic Bishops Conference of the Philippines (CBCP) ang natabo kay Fr. Chito bangud yara ini sa sulod sang St. Mary’s Cathedral sang ginkuha sang terorista nga grupo.
Magluwas sa CBCP, may residente sang Marawi man nga nagkumpirmar sang balita sa ila nga pamilya.
Kadungan sini, nag-apela man sang pangamuyo ang pamilya Suganob agud nga luwas ini nga mahilway.
Nahibaluan nga residente sang banwa sang Norala South Cotabato si Fr. Chito kag didto lamang nakadestino sa Marawi City humalin pa sang 1995.
Samtang, pabor naman ang pamilya Suganon sa deklarasyon sang Martial law apang ginahingyo lamang sa militar kag kapulisan nga luwas kag buhi ini nga mahilway gikan sa kamot sang mga terorista.