KORONADAL CITY – Natumid na sang mga otoridad ang mga suspek sa pagpalupok sang isa ka Improvised Explosive Device (IED) alas-2 kaina sang kaagahon sa banwa sang Isulan, Sultan Kudarat.
Ini ang ginkumpirmar ni Police Supt. Joefel Siason, hepe sang Isulan PNP sa interbyu sang Bombo Radyo Koronadal.
Suno kay Siason, isa ka lalaki ang nakit-an sang mga security guard sa public market sa Talipasan St, Barangay Kalawag 3, Isulan Sultan Kudarat nga may ginbilin nga plastic sa basurahan.
Sang ginsita suno pa sang mga security guard ang suspek, madasig ini nga nagpalagyo kag nabilin ang motorsiklo sini nga ginamaneho.
Bangud sa makaduluda nga hulag sang suspek gilayon nga ginkordon sang mga pulis kaupod ang EOD team ang lugar antes pa man ang paglupok sang bomba rason nga wala sang may napilasan sa insidente.
Pag-abot sang alas-4 sang kaagahon isa naman ka ginadudahan nga bomba ang narekober sa atubangan sang isa ka bangko sa nasambit man nga lugar nga gilayon na-disrupt sang EOD team.
Nag-negatibo naman sa bomba ang ikaduha nga butang nga ginpalupok sang EOD team.
Sa subong, ginahibalo pa sang mga otoridad kun may kaangtanan sa natabo nga engkwentro sa tunga sang militar kag mga bandido sang nagligad nga semana ang pagpalupok sa banwa sang Isulan.
