KORONADAL CITY – Isa ang patay samtang isa naman ang pilason makaligad nga magresulta sa engkwentro ang ginpatigayon nga drug buy bust operation sang Koronadal City PNP kag City Anti-Drug Action Council (CADAC) sa Purok ML Quezon, Barangay San Jose, Koronadal City alas 7:55 kagab-i.
Sa interbyu sang Bombo Radyo Koronadal kay Dr. Glorio Sandig, CADAC Action officer sang Koronadal, may nabaton sila nga report angot sa matabo nga baligyaanay sang droga sa nasambit nga lugar rason nga nagpatigayon sila sang operasyon.
Napatay matapos nga magbato sa mga otoridad ang isa sa mga suspek nga ginkilala kay Richie Toledo Lebrado, aktibo nga katapu sang 33rd IB, Philippine Army samtang arestado naman ang mga kaupdanan sini nga sanday Herbert Deloso alyas Mayong, Ronald Danggautan, kag Erickson Ligaya.
Pilason naman sa operasyon si PSI Ramil Aruelo, intel officer sang Koronadal PNP bangud sa pagkambyuhanay sang lupok.
Suno pa kay Sandig, target sang operasyon si alyas Mayong nga madugay na nga ginasurveillance bangud sa pagduso sang droga.
Nakuha sa mga suspek ang 2 big pack, 1 medium kag 1 small sachet sang ginapatihan nga shabu kaupod na ang mga armas luthang.
Gilayon naman nga nag-imbestigar ang SOCO sa lugar makaligad nga matabo ang engkwentro.
Sa subong, napreso na sa lock up cell sang Koronadal City PNP ang mga naaresto nga suspek samtang nagapaayo naman sa hospital ang pilason nga pulis.
