KORONADAL CITY – Mabudlay sa subong nga agyan ang dalanon sa bahin sang Barangay Poblacion, Lake Sebu, South Cotabato matapos nga matabunan sang natiphag nga duta tuga sang landslide matapos ang mabaskog nga pagbubo sang ulan.
Ini ang ginkumpirmar ni Jose PareÑo, Municipal Disaster Risk Reduction and Management Officer sang Lake Sebu, sa interbyu sang Bombo Radyo Koronadal.
Suno kay PareÑo, halos tabunan sang duta ang dalan pasaka sa Sta. Cruz Mission bangud sa pagkatiphag sang duta.
Gilayon naman nga nagpatigayon sang assessment ang ila nga talatapan agud nga masuguran ang clearing operation sa lugar.
Magluwas sa napagkit nga landslide nakaeksperiensiya man sang pagbaha ang pila ka mga barangay sa nasambit nga banwa.
Samtang, nanghatag na sang food packs ang MDRRMO-Sto Niño sa halos 10 ka pamilya nga apektado sang baha sa ila nga banwa matapos nga naguba ang dike kag nag-awas ang tubig baha.
Suno kay MDRRMO Alejo Dennis Fale sang banwa sang Sto. Niño, may mga pananom man nga naguba sang baha kag natumba nga mga puno sa ila nga lugar.
Sa subong, ginahibalo pa sang PDRRMO-South Cotabato ang kabug-usan nga damyos nga ginbilin sang pagbaha kag landslide sa 4 ka mga banwa nga apektado sang kalamidad tuga sang mabaskog nga pagbubo sang ulan.
