KORONADAL CITY – Ginaawhag sang isa ka national awardee nga Barangay Nutrition Scholar ang mga ginikanan nga atipanon sang maayo ang ila mga kabataan agud nga indi maapektuhan ang ila nga panghuna-huna.
Ini ang ginpakigbahin ni G. Junelia Donel, iloy sang 6 ka mga bata nga residente sang Brgy. New ilo-ilo, Tantangan, South Cotabato kadungan sang Mother’s day special program sang Bombo Radyo Koronadal kahapon.
Suno kay Donel,30 ka tuig na siya nga nagaserbisyo bilang BNS kag ginakabig nga iloy sang mga malnourish nga mga bata sa ila nga barangay.
Bangud sa pagtinguha nga wala na sang may magutom sa ila nga lugar sang tuig 2013, ginkilala ini bilang Barangay Nutrition Scholar national awardee kun diin siya ang nangin pambato sang Region 12.
Apang, suno sa iya, wala niya ini ginalauman bangud siya ang nagatrabaho nga wala sang ginahuna-huna nga balos.
Apisar nga 6 ang mga bata sini nga ginaatipan, nagahatag ini sang oras para sa mga malnourish nga bata sa ila nga lugar agud nga mapakaon sa ginapatigayon nga feeding program.
Magluwas sini, inisyatibo niya man ang pagtipon sang mga basura kabaylo sang bugas para sa mga pigado nga pamilya sa ila nga lugar.
Mabudlay ang mangin iloy kag BNS apang tama nga pagbalanse lamang sang oras ang iya nga ginahimo agud nga makaserbisyo sa pamilya kag sa komunidad.
