KORONADAL CITY- Naglab-ot sa masobra 2 mil ka mga raliyesta ang nagtililipon sa siyudad sang Koronadal agud ipanawagan kay Pangulong Rodridgo Duterte nga kakason na ang tax nga ipahamtang sa mga kooperatiba sa pungsod.
Sa interbyu sang Bombo Radyo Koronadal kay Rey Abella, isa sa mga board of directors sang kooperatiba sa Mindanao, kalakip sa mga rason kun ngaa indi mahimo nga pahamtangan sang buwis ang kooperatiba amo nga 90% suno pa sang mga miyembro sini ang nagikan sa pigado nga sektor kasubong sang mga mangunguma, ordinaryo nga trabante kag OFWs.
Magluwas sini, indi man magdako ang mga kooperatiba kun ini ang pagabuwisan sang gobyerno kag magadyutay man ang serbisyo nga mahatag nila sa mga miyembro nga kadam-an pigado.
Nahibaluan nga nagikan sa nagkalain-lain nga bahin sang Mindanao ang mga nagpartisipar sa hublag protesta nga gintawag nila nga “Mindanao Synchronized Convergence of Cooperatives.”
Nagalaum naman si Abella kag ang mga kaupdanan sini nga pamatian sang mga opisyal sang gobyerno kaupod na ni Pangulong Rodrigo Duterte ang ila nga hingyo.
