KORONADAL CITY- Naglab-ot na sa masobra 24,000 ka mga residente halin sa 6 ka mga banwa sang probinsya sang Maguindanao ang nagbakwit humalin sang naglunsar sang airstrikes kag ground assault ang Armed Forces of the Philippines batuk sa mga myembro sang Bangsamoro Islamic Freedom Fighters (BIFF) nga nagapalapnag sang kinagamo sa nasambit nga probinsya kag kaiping nga mga lugar.
Ginalakipan ini sang Datu Salibo, Datu Piang, Talitay, Datu Anggal Midtimbang, Sharriff Sayduna Mustapha kag Datu Saudi Ampatuan, Maguindanao.
Nahibaluan nga pila sa mga nagbakwit nga residente ang temporaryo nga naga-istar sa nagkalain-lain nga mga buluthuan,temporary shelters kag mga himata.
Kaangot sini, ginpahayag ni 6th Infantry Kampilan Division spokesperson Capt. Arvin John Encinas nga padayon ang ila monitoring sa lugar partikular na sa Datu Salibo nga sentro sang ila operasyon kun sa diin target ang mga kampo sang BIFF.
Sa pihak sang nagapadayon nga opensiba batuk sa BIFF, nagalaum ang tropa sang gobyerno nga wala sang sibilyan nga mapatay rason nga mas ginpahugtan pa nila ang koordinasyon sa mga opisyal kag sibilyan sa nasambit nga mga lugar.
