KORONADAL CITY – Yara na sa kustodiya sang Suralah PNP ang ugangan kag umagad sini makaligad madakpan sa ginpatigayon nga entrapment operation sa siyudad sang Koronadal bangud sa modus nga pagbaligya sang peke nga plane ticket kag tour packages.`
Ginkilala ang mga suspek nga sanday Myra Himalla Dagum, 40, may-asawa, negosyante kag residente sang Barangay Naci, Surallah, South Cotabato kag ang ugangan sini nga si Bernadeth Peñol Dagum, 65, balo nga residente sang Purok Bagong Silang, Barangay New Iloilo, Tantangan, South Cotabato.
Suno kay Police Chief Inspector Joel Fuerte, hepe sang Surallah PNP, nagalab-ot sa P1 milyon ang nakuha nga kwarta sang duha gikan sa masobra 30 ka mga biktima bangud sa pagbaligya sang mga peke nga plane ticket kag tour packages sa banwa sang Surallah, South Cotabato usar ang ila Three JMD Travel and Tours business.
Sa interbyu sang Bombo Radyo Koronadal kay Gina Pagulong, isa sa mga complainant, yara sa P400,000 ang ginbayad nila sa ticketing office sang mga suspek nga nahamtang sa Public Market sang Surallah sang nagligad pa nga tuig para kuntani sa ila nga family vacation padulong sa Hong Kong apang, napadulong lamang sa wala.
Suno pa kay Pagulong, 22 sila nga magabakasyon kuntani kun diin tag-P21,000 ang ginsukot sa ila.
Ang iban naman sa mga nabiktima ang yara sa airport na apang wala makasakay sang eroplano bangud wala naka-book ang ticket nga ila ginauyatan.
Ang mas masakit pa, may nakalab-ot na sa iban nga pungsod nga nagkuha sang roundtrip ticket apang one-way ukon pakadto lamang ang nabook sa ila.
Samtang, hugot naman nga ginpanginwala sang mga suspek ang pasibangud sang mga biktima bangud wala sila sang sala kag at nakahanda nga bayaran ang mga nakapabook sa ila.
Apang, pursigido naman ang mga biktima nga magpasaka sang kaso nga large scale estafa nga wala sang piyansa sa mga suspek.
