KORONADAL CITY – Gin-istudyuhan na sa subong sang mga otoridad ang CCTV footage nga kuha sa terminal sang Yellow Bus Lines Incorporated kun diin nasapwan ang patay nga lapsag.
Ini ang ginkumpirmar ni Miguel Alfredo, ang supervisor sang YBL terminal sa interbyu sang Bombo Radyo Koronadal.
Suno kay Alfredo, nasapwan na lamang kahapon ang wala na sang kabuhi nga lapsag nga possible nga bag-o bun-ag pa lamang, wala sang panapton kag may nabutang nga napkin sa iya nga baba.
Ang utility suno pa nga magalimpyo kuntani sang CR ang nakadiskobre sa patay nga lapsag.
Nagapangduha-duha naman ang mga otoridad, nga ginhungod sang iloy nga butangan sang napkin ang baba sang lapsag agud nga indi mabatian ang hibi sini tubtub tigayon nga napatay.
Nagalaum naman ang mga otoridad nga paagi sa CCTV footage makilala ang iloy nga nagbilin sang lapsag.
