KORONADAL CITY – Dako suno pa ang posibilidad nga makabalik pa sa operasyon ang mga minahan sa pungsod nga napasira sang DENR sa pagpungko ni outgoing secretary Gina Lopez makaligad nga ginbasura sang CA ang appointment sini.
Ini ang reaksiyon ni South Cotabato Governor Daisy P. Avance Fuentes sa Bombo Radyo Koronadal.
Suno kay Fuentes, yara sa 98% sa subong ang oportunidad sang mga mining firms nga mapadayon ang ila nga operasyon kaupod na ang copper and gold mine project sang Saguitarrius Mines Incorporated (SMI) sa probinsiya sang South Cotabato.
Sadto pa man nga yara sa posisyon si Lopez, kampante ang mga taga-South Cotabato kag mga kaiping nga lugar nga indi na madayon pa ang operasyon sang SMI bangud sa open pit mining method.
Apang, bangud sa pagkadula ni Lopez, nabalaka ang gobernadora nga matigayon naman ang operasyon sang nasambit nga mining company.
Kaangot sini, ginpasiguro sang gobernadora nga mapabilin ang pagpatuman sang Environmenral Code sang probinsiya nga nagadumili sa pag-angkon sang open pit mining.
Samtang, nagapati naman si DENR MGB 12 regional director Constancio Paye nga wala pa man nagsugod ang operasyon sang Sagguitarius Mines Inc. (SMI) matapos ang pag-untata sang ila mining operation sang nagligad nga tuig.
Apang, sa subong yara na daw ini sa permitting stage kag nagapadayon ang pakignegosasyon sa mga Lumad nga isa sa mga requirements antes magsugod ang ila nga operasyon.
