KORONADAL CITY – Wala ginalauman ni Police Senior Superintendent Franklin Alvero, Police Provincial Director sang South Cotabato nga may magakuha sang laragway sa ila samtang nagakaon sa isa ka sikat nga fast food chain kaupod ang 10 ka mga street children.
Sa interbyu sang Bombo Radyo Koronadal kay PSSUPT Alvero, sadto pa man ginahatagan niya na sang importansiya ang mga bata kag naluoy siya sa mga ini labi na kun makita sa dalan nga wala sang makaon.
Suno pa sa opisyal, samtang nagalibot siya kaupod ang isa pa ka pulis, nakita niya ang mga bata rason nga gintawag niya ang mga ini kag gin-istorya kun sa diin ang ila mga ginikanan.
Makaligad nga mahibaluan nga wala pa makakaon ang mga ini, ginhagad niya ang mga bata kag ginpakaon sa food chain.
Pagkatapos suno pa nga magkaon, gin-istorya niya liwat kag ginhambalan nga magasumpa ang mga ini nga magpauli sa ila nga puluy-an, indi magpangawat, indi mag-usar sang droga kag indi maghimo sang anuman nga krimen.
Aminado si Alvero nga sa tion nga mapabay-an ang nasambit nga mga bata, magaabot ang panahon nga mangin problema ang mga ini sang komunidad.
Balewala naman kay Alvero ang mga pagdayaw gikan sa netizens bangud suno sa iya ginhimo niya lamang kun ano ang nagakadapat.
Nahibaluan nga isa ka netizen ang nagpost sang laragway nga nakatalikod ang duha ka pulis nga nagakaon kaupod ang 10 ka mga street children.
