KORONADAL CITY– Ginpaguwa na sa publiko sang kapulisan ang Artist sketch sang suspek sa pagpatay sa Municipal Councilor sang Datu Abdullah Sangki sa Maguindanao.
Suno kay PSupt. Rannie Hachuela, hepe sang Tacurong City PNP, ang sketch nga ginpaguwa ang base sa mga pahayag sang mga testigo sa pagpangluthang-patay kay Narhasin Malaguia Ulangkaya, 28, nga konsehal sang Datu Abdullah Sangki, Maguindanao.
Madumduman nga ginluthang sang makatatlo ka beses si Ulangkaya sang suspek samtang nagatambong sang kasal sa Terminal Exit Purok Salvacion, Barangay Calean Tacurong City sang Sabado.
Sa subong, nagapadayon pa ang imbestigasyon kun diin ginahibalo sang mga otoridad ang motibo sa krimen.
Kadungan sini, nagpanawagan naman ang kapulisan sa sin-u-man nga makatudlo sa ginapanaguan sang suspek.
