KORONADAL CITY – Nakig-angot na ang mga otoridad sa GPH/MILF Ceasefire Committee sa natabo nga engkwentro sa tunga sang grupo sang Moro Islamic Liberation Front (MILF) kag CAFGU members sa Sitio Valencia, Barangay Bualan, Pikit, North Cotabato agud mauntat na ang nilukpanay.
Ini ang ginkumpirmar ni PSSUPT. Emmanuel Peralta, provincial director sang Cotabato province sa interbyu sang Bombo Radyo Koronadal.
Suno kay Peralta, clan war ukon family feud ang nakita nila nga rason sang nasambit nga engkwentro bangud madugay na nga may away ang mga pamilya sa nasambit nga lugar bangut sa duta nga ang iban may mga himata nga MILF.
Sa subong, nagapadayon pa ang imbestigasyon sang Pikit PNP sa hitabo kag ginahibalo kun sin-o ang una nga nagpalupok.
Wala naman suno pa sang pilason sa insidente apang nagtuga ini sang kahadlok sa mga tawo sa lugar.
Madumduman nga sang nagligad nga bulan sang Pebrero may 2 ka mga tinawo sang MILF sa nasambit nga lugar nga napatay sa pagpangluthang nga ginkilala kanday Solaiman Dimanalao kag Toks Macasasa sang 9th Brigade sang MILF Inner Guard sa idalom sang National Guard Division sang Bangsamoro Islamic Armed Forces (BIAF).
Una naman nga nagpanawagan si Pikit Mayor Sumulong Sultan sa mga pamilya nga nagaaway sa lugar nga untatan na ang nilukpanay kag makig-dayalogo agud nga masolusyunan ang problema.
