KORONADAL CITY – Ginguba sang mabaskog nga hangin dala sang pagbubo sang ulan ang Day Care Center sa Sitio Lemblisong, Kablon, Tupi, South Cotabato.
Ini ang ginkumpirmar ni Municipal Disaster Risk Reduction and Management Officer (MDRRMO) Emil Sumagaysay sa interbyu sang Bombo Radyo Koronadal.
Suno kay Sumagaysay, ginlupad sang mabaskog nga hangin ang atup sang nasambit nga edifisyo rason nga nabasa ang mga pagkabutang sa sulod sang amo nga buluthuan.
Magluwas sa nasambit nga buluthuan, may apat ka puluy-an man ang ginguba sang buhawi.
Sa subong ginahibalo pa kun may pananom nga naguba sa pagpanalasa sang buhawi sa nasambit nga banwa.
Naghingyo naman sang bulig ang nasambit nga buluthuan sa LGU-Tupi agud nga mapakay-o ini kag magamit sa palaabuton nga pagbukas sang klase.
