KORONADAL CITY- Nagresulta sa mapait nga trahedya ang relasyon sang magnobyohanay sa Brgy. San Pablo sa syudad sang Tacurong.
Sa impormasyon nga ginpalab-ot sa Bombo Radyo Koronadal, ginkilala ang biktima kay Rosalinda Masulot 17 anyos kag residente sang nasambit nga syudad kun sa diin nagluntad ang insidente sang makigkita ini sa iya nobyo nga residente sang Buluan, Maguindanao.
Sa panaysayon sang biktima bag-o pa man ini ginbawian sang kabuhi, ginhagad ini sang suspek sa Tacurong nga maglagaw sa palm oil plantation kun sa diin pag-abot sa lugar ginhagad man ini nga makighilawas.
Wala suno pa ini nagpasugot kag nagpamalibad kun sa diin gintilawan sini nga magpalagyo sang ginapugos na ini nga makighilawas apang bag-o pa man nakapalagyo naabtan ini kun sa diin ginbuno sang pila ka bes sa bahin sang iya ulo kag lawas.
May nakabulig pa sa biktima kag nadala pa ini sa balay bululngan kag nasaysay pa sini ang iya gindangatan apang makaligad ang pila ka oras nacomatose na ini kag sa ulihi ginbawian na sang kabuhi.
Sa subong padayon pa nga ginahibalo sang kapulisan ang identity sang suspek kag nagapadayon man ang imbestigasyon.
