KORONADAL CITY- Magapadayon sa gihapon ang paglagas sang militar sa mga nabilin pa nga myembro sang terorista sang Abu Sayyaf Group (ASG) makaligad marekober ang dako nga kampo sang mga ini sa Brgy. Cabcaban, Sumisip sa probinsya sang Basilan.
Ini ang ginpahayag ni Capt. Joan Petinglay, spokesperson sang WESTMINCOM sa interbyu sang Bombo Radyo Koronadal.
Suno kay Petinglay, dako nga kawad-an para sa ASG ang pagkarekober sang 68th Infantry Battalion Philippine Army sang 38 ka mga bunkers kag tatlo ka mga guard post sa sulod sang ila nga kuta.
Luwas sini amuh ang mga narekober nga high powered firearms.
Aminado man si Petinglay nga nabudlayan ang mga suldado nga lagson kag dakpon ang mga Abu Sayyaf apang sa padayon suno pa nga operasyon kag suporta sang mga LGUs kag pumuluyo mapatuman ang luyag ni Pres. Duterte nga mapulbos ini.
Kaangot sini, nag apela sang pangamuyo ang opisyal sa tanan para sa kaluwasan sang mga suldado nga nagapatigayon sang operasyon batuk sa terorista nga grupo.
