KORONADAL CITY- Nagapadayon ang imbestigasyon sang kapulisan sa nagluntad nga pagpangluthang patay sang anay myembro sang Philippine Army sa kaugalingon sini nga utod sa Brgy. Guinsang-an Sto. Niño South Cotabato.
Sa interbyu sang Bombo Radyo Koronadal, ginkilala ang biktima kay Eden Grejaldo Benal 54 anyos samtang ang suspek amuh ang kaugalingon sini nga utod nga ginkilala kay Edgardo Grejaldo Benal 51 anyos kag isa ka retired army.
Nahibaluan nga nagluntad ang krimen makaligad nga makaangkon sang mainit nga argumento ang mag-utod samtang yara sa tindahan sang biktima kun sa diin usar ang kalibre 45 nga pusil, ginluthang patay sini ang kaugalingon nga utod.
Nakaangkon naman sang igo sang bala sa bahin sang iya ulo ang biktima mangin man sa nagkalain-lain nga bahin sang iya lawas.
Boluntaryo naman nga nagsungka ang suspek sa kapulisan sang Sto. Niño PNP kun sa diin gilayon nga ginpaidalom sa imbestigasyon kag natalana nga pasakaan sang nagakaigo nga kaso.
