KORONADAL CITY – Lubos ang pagpasalamat sang utod sang isa ka menor de edad nga biktima sang child labor sa banwa sang Banga, South Cotabato makaligad nga maluwas sa bulig sang Bombo Radyo Koronadal.
Una diri, nagpadulong sa waragwagan sang Bombo Radyo si Samuel Mansibad agud nga maghingyo sang bulig angot sa utod sini nga ginapatrabaho sa talamnan sang balinghoy sa Bo. 7, Banga, South Cotabato.
Sa panaysayon ni Mansibad, gindul-ong suno pa sang iya iloy kag utod nga lalaki si alyas Benjie agud patrabahuon sa isa ka negosyante didto gikan sa ila nga lugar sa Jose Abad Santos, Davao del Sur.
Apang, ang malain bangud nag-utang ang iya pamilya sa wala na ginhingadlan nga negosyante kabaylo sang pagtrabaho ni alyas Benjie didto.
Kag bangud naluoy siya sa iya nga utod magluwas nga isa ka menor de edad, may diperensiya man ini sa panghuna-huna rason nga gintawgan sini ang nasambit nga negosyante agud nga kuhaon kuntani ang iya utod.
Apang, ginpahayag sang negosyante nga dako ang utang sang iya pamilya rason nga indi niya pagpahanugutan nga makapauli ini apisar 3 ka bulan na ini nga nagatrabaho didto.
Naabtan mismo ni Samuel kag sang reporter sang Bombo Radyo Koronadal nga nagahakwat sang sinako nga balinghoy ang ang iya nga utod.
Rason nga gin-istorya sini ang nasambit nga negosyante nga nasorpresa sa pag-abot sini kaupod ang reporter sang Bombo Radyo.
Kag sa bulig sang Bombo nakuha ni Samuel ang utod sini kag naluwas sa temprano nga pagtrabaho sang mabug-at gikan sa negosyante nga ginreklamo sini sang child labor.
