KORONADAL CITY – Emosyunal kag lubos ang pagpasalamat ni Jessa Mae Garay, asawa ni PFC Samuel Garay sa paghilway sang mga rebelde nga NPA sa bana sini kahapon.
Sa eksklusibo nga interbyu sang Bombo Radyo Koronadal kay Jessa Mae, ginpahayag sini nga nahatagan siya sang paglaum bangud buhi nga nahilway ang iya nga bana kag may pagakilalahon pa nga amay ang igabun-ag nga bata sini.
Nahibaluan nga 5 ka bulan na nga nagadala si Jessa Mae kag siya mismo ang nagsugat kahapon sa iya bana kun diin naghilibion ang mga ini samtang nagahaksanay.
Aminado si Jessa Mae nga sang yara pa sa kamot sang mga rebelde ang iya nga bana halos indi ini makakaon kag nadulaan sang paglaum nga mabuhi.
Samtang, wala naman ginalauman ni Ginang Normalia Calocop, asawa ni Sgt. Solaiman Calocop nga mabuhi pa ang bana sini.
Suno sa iya, sang naguwa ang balita nga ginkidnap ang bana sini ila na ginkonsiderar nga patay na ini.
Apang, bangud sa ginpatigayon nga negosasyon agud mahilway ang iya nga bana nagapasalamat ini sang dako bangud may makaupod pa siya nga magapadako sa ila 5 ka mga kabataan.
Sa subong, wala pa mahibaluan snag pamilya sang duha ka ginhilway nga suldado kun pahanugutan nila nga magbalik sa serbisyo ang tagsa nila ka bana.
