KORONADAL CITY – Ginpasaka na sa mga otoridad sa double alert status ang seguridad sa siyudad sang Tacurong kag bug-os nga probinsiya sang Sultan Kudara makaligad ang paglupok sang IED.
Ini ang ginpahayag ni PSI Ronalyn Domider, spokesperson sang Tacurong City Police Station sa interbyu sang Bombo Radyo Koronadal.
Suno kay Domider sa subong padayon pa nga ginahibalo kun ano nga sahi sang IED ang asod-asod nga naglupok kagab-i sa Dragon Mart convenience store kag gasoline station sa national highway, Brgy. Poblacion, Tacurong City.
Natalana naman nga ipaidalom sa interogasyon ang duha ka mga naarestar nga mga suspek nga sanday Warren Gane, 18, kag Juhari Gane, 19 nga lunsay mga residente sang Maguindanao kag nakuhaan sang tag-isa ka granada.
Hibaluon man kun may kaangtanan sa mga terorista nga grupo ang duha ka mga suspek nga yara sa kustodiya subong sang Tacurong City PNP.
Samtang, duha na lamang sa kabug-usan nga 16 ka mga pilason ang nagapabilin subong sa hospital nga ginpaidalom sa operasyon kag yara nasa estable nga kondisyon.
Aminado si Domider antes pa man ang Holy Week nakabaton na sila sang report angot sa balita nga pagpalupok sang masobra 10 ka mga bomba sa nagkalain-lain nga lugar sa Mindanao matapos ang suno pa pagsinapol sang mga katapu sang Bangsamoro Islamic Freedom Fighters (BIFF), Maute terror group, Abu Sayyaf group, local ISIS kag mga local recruit sang terorista nga Jemmaah Islamiyah sa Brgy. Kitango, Datu Piang, Maguindanao.
