KORONADAL CITY – Wala na sang paglaum pa nga mabuhi.
Ini ang ginrason sang ex-convict na si Johnfrix Escalada, 49, na residente ng Purok 13, Barangay Polunoling, Tupi, South Cotabato sa iya ginhimo nga paghostage sa sulod sang apat ka oras sa mga bata sini nga nagresulta sa pagpanglabo sa ila.
Sa eksklusibo nga interbyu sang Bombo Radyo Koronadal kay Escalada ginpahayag sini nga lubos man siya nga nagahinulsol sa ginhimo kag nakahanda nga liwat mapreso.
Gin-ako man sini nga bangud sa problema sa ila nga pamilya nadula siya sa tama nga panghuna-huna kag nahimuan sang malain ang kaugalingon nga mga bata.
Depression, kapigaduhon kag personal nga problema naman ang nakita ni Tupi Mayor Reynaldo Tamayo Jr. nga rason ni Escalada agud himuon ang hostage drama.
Suno kay Mayor Tamayo, nakita sini ang sitwasyon sang suspek rason nga indi niya man ini mabasol sa natabo.
Ginpasiguro naman sini nga nakahanda nga buligan sang Municipal government sang Tupi ang pamilya Escalada.
Samtang, luwas na sa kapahamakan ang mag-utod nga sanday Maria Fritzie, 9 kag Cendrix, 6, matapos nga madala sa South Cotabato Provincial Hospital.
Nahibaluan nga ginpaidalom sa operasyon ang mag-utod bangud sa malubha nga mga pilas nga naangkon sang mga ini.
Sa tion nga mag-ayo na igapaidalom sa stress de-briefing ang mag-utod kaupod ang iloy sang mga ini bangud sa trauma tuga sang hitabo.
Madumduman nga una na nga napreso ang suspek bangud sa kaso nga robbery with homicide.
