KORONADAL CITY – Naglab-ot sa masobra tunga sa milyon nga ginapatihan nga shabu ang nakumpiskar sang mga otoridad sa ginpatigayon nga operasyon batuk sa 3 ka notoryos nga lider sang isa ka sindikato sang droga sa Pigcawayan, Cotabato.
Ang nasambit nga operasyon ang ginpatigayon sang gintingob nga pwersa sang Philippine Drug Enforcement Agency (PDEA) Regional Office 12, Cotabato Police Provincial Office (CPPO), CPPO- PPSF, Provincial Intelligence Branch (PIB) – Cotabato, Regional Intelligence Division (RID) 12, Regional Public Safety Battalion (RPSB) 12, 4th SAB-SAF, Pigcawayan Municipal Police Station, 34th Infantry Battalion – Philippine Army kag 7th Infantry Battalion – Philippine Army kun diin ginserbe sang mga ini ang search warrant sa 3 ka notoryos nga lider sang sindikato sa Barangay Buricain, Pigcawayan, Cotabato.
Antes pa man naserbe ang search warrant nagluntad pa ang 5 minuto nga engkwentro sa tunga sang mga operatiba batuk sa isa ka grupo sang mga armado sa nasambit nga lugar.
Una nga ginsuyod sang raiding team ang puluy-an ni Roger Akmad alyas Roger Sampillo nga nagresulta sa pagkakumpiskar sang 4 ka medium sachets sang ginapatihan nga shabu nga may kabug-aton nga 20 gramo samtang sa puluy-an sang isa pa ka target nga suspek nga si Lolly Sampillo Abas ang nakumpiskar naman ang 5 big kag 2 small sachet sang shabu nga naglab-ot sa 40 gramo.
Isa pa nga target sang operasyon ang puluy-an naman ni Udtog Akmad alias Udtog Sampillo nga nakuhaan sang 1 large kag 3 medium sachet sang suspected shabu nga naglab-ot sa 20 gramo.
Narekober man sa puluy-an sang mga suspek ang nagkalain-lain nga armas luthang kag 8 suspected carnapped nga motorsiklo.
Nahibaluan nga ang grupo nanday Akmad kag Abas ang kilala nga notoryos nga sindikato sang illegal nga droga sa probinsiya sang Cotabato kag Maguindanao.
Sa subong, ginapreparar na ang kaso batuk sa mga suspek nga nagapabilin nga-large.
