KORONADAL CITY- Naglab-ot sa 33 ka mga pamilya ang apektado sang natabo nga sunog sa Casa Subdivision Block 1 kag Block 2, Barangay Zone 3, Koronadal City alas -7:51 kagab-i.
Suno kay Senior Inspector Reginald Legaste, city fire marshall sang Koronadal , ginahibalo pa nila kun ano ang gintunaan sang sunog kun diin ginapatihan nga nagikan ini sa puluy-an ni Melanie Aguasito.
Gilayon naman nga nagpatigayon sang emergency meeting ang barangay Zone 3 sa pagpanguna ni Barangay Chairman Bert Hinay agud nga makahatag sang gilayon nga bulig sa mga apektado sang sunog.
Sa subong ginahibalo pa nila ang kabug-usan nga damyos sang sunog.
Samtang, ginpahayag ni Norhata Benito, head sang Disaster Risk Reduction and Management ng Department of Social Welfare and Development (DSWD) Field office -12 nga subong nga aga magahatag sila sang relief assistance sa mga apektado nga pamilya.
Madumduman nga gindeklarar nga fire out ang sunog alas -8:30 kagab-i kun diin ginrespondehan ini sang walo ka mga fire trucks.
