KORONADAL CITY – Nakahanda nga itaya sang suno pa bagman kag nangin police senior assistant ni anay DILG Secretary Mike Sueno ang iya nga posisyon kag career bilang pulis agud nga pamatud-an nga wala nagbaton sang payola gikan sa illegal activities ang gintal-tal nga tiglikom.
Sa eksklusibo nga interbyu sang Bombo Radyo Koronadal kay Police Senior Supt. Alex Sintin, chief sang system in Integration Management Division sa Camp Crame, ginpahayag sini nga indi matuod ang mga aligasyon batuk kay Sueno bangud siya ang saksi kun sa ano kabuot kag tampad sa serbisyo ang tiglikom.
Ginbuyagyag pa ni Sintin nga sa sulod sang anum ka bulan nga pag-assist sini kay Sueno madamo sang mga grupo kag nagapakilala nga mga police official nga luyag makaistorya ang tiglikom agud nga mapasugot ini nga gamiton ang iya pangalan sa pagbaton sang mga payola gikan sa illegal gambling kag iban pa nga mga illegal nga aktibidad.
Kaangot sini, ginlaygayan suno pa ni Sintin si Sueno nga indi makig-istorya sa mga ini kag indi pagpabay-an nga gamiton ang iya nga pangalan.
Matapos sini, nagpaguwa sang memorandum si Sintin nga may pirma ni Sueno nga nagamandu sa tanan nga mga regional directors nga indi magbaton sang anuman nga payola kabaylo sang paggamit lamang sang DILG secretary.
Sa pagkamatuod, may isa ka pulis na nga gin-imbestigaran matapos nga nabuyagyag ang paggamit sini sang pangalan ni Sueno sa pagbaton sang payola.
Ang nasambit nga police officer ang ginsaylo na sa ARMM bangud sa ginhimo sini.
Kaangot sini, nakahanda nga magpaidalom sa imbestigasyon si Sintin agud nga mapamatud-an ang iya nga ginpahayag.
