KORONADAL CITY- Ginakabalak-an na ang pagsaka sang numero sang mga nagakapatay bangud sa balatian nga dengue sa probinsya sang South Cotabato.
Sa impormasyon nga ginpaguwa sang Provincial Epidemiology and Surveillance Unit (PESU) sang Integrated Provincial Health Office sang South Cotabato, naglab-ot na sa 6 katawo ang napatay bangud sa nasambit nga balatian samtang yara naman sa 885 ang napagkit nga kaso sang dengue subong nga tuig lamang.
Nahibaluan nga 2 na ang patay sa Koronadal, 2 sa banwa sang Polomolok kag tag-isa naman sa banwa sang Surallah kag Tupi,South Cotabato.
Pinakamadamo naman ang napagkit nga kaso sang nasambit nga balatian ang mga kabataan suno sa pamunuan sang South Cotabato Provincial Hospital.
Gani nagapahanumdom ang mga opisyal nga ipabilin nga malimpyo ang palibot agud nga wala sang may maistaran ang lamok ilabi na nga masami nagabubo ang ulan sa probinsya.
