KORONADAL CITY- May ginasundan na nga anggulo ang mga otoridad sa natabo nga pagpalupok sang IED sa siyudad sang Tacurong agud nga matumod ang grupo nga may kahimuan sang pagpasigabong.
Suno kay Sultan Kudarat Police Provincial Director SSupt. Raul Supiter, nga ginahibalo na nila ang signature sang naglupok nga IED kag indi lamang extortion ang motibo nga ila nga ginaistudyuhan kundi may iban pa.
Madumduman nga ginpanginwala sang pamunuan sang SUKELCO nga extortion ukon pagpangilkil ang motibo sa likod sang nasambit nga hitabo.
Suno kay SUKELCO general manager Claudia Pondales wala suno pa sila sang may nabaton nga pagpamahog ukon extortion letter rason nga malayo ang motibo nga ini sa nasambit nga pagpasigabong.
Samtang, nagapaayo na sa subong ang 8 biktima sang pagpasigabong sang IED kun diin ginsabat sang SUKELCO ang tanan nga galastuhon sang mga biktima labi na kag 7 sa 8 ka mga pilason ang mga empleyado sang kooperatiba.
Sa subong padayon nga ginaistudyuhan ang kuha sang CCTV camera nga naka-install sa ila nga talatapan para sa nagapadayon nga imbestigasyon.
Balik naman sa normal ang siyudad sang Tacurong matapos ang nasambit nga hitabo.
