KORONADAL CITY – Posible nga magsaka pa ang patay sa nagluntad nga engkwentro sa tunga sang duha ka mga armado nga pamilya sa bahin sang probinsya sang Cotabato.
Ini ang ginpahayag ni North Cotabato Police Provincial Director Police Senior Superintendent Emmanuel Peralta, matapos nga liwat nga nakaangkon sang engwentro ang pamilya Matalam kag Cua sa Brgy. General Luna Carmen Cotabato nga may madugay na nga away bangud sa duta.
Madumduman nga 6 ang ginmensyonar ni Peralta nga nautas ang kabuhi bangud sa nagluntad nga engkwentro.
Samtang nagbakwit naman ang pila ka mga pamilya nga yara malapit sa lugar bangud sa tuman nga kahadlok nga maulamid sa kinagamo sa tunga sang duha ka pamilya.
Dugang pa ni Peralta nga ginatilawan sang mga otoridad nga mangin maayo na ang sitwasyon kag mahatagan na sang solusyon ang amu nga problema.
