KORONADAL CITY- Dako nga kadungganan para sa probinsya sang Maguindanao ang pagpili sa isa ka Maguindanaon nga irepresenta ang Pilipinas para sa Mister Culture World 2017 subong nga bulan sang Mayo 2017 nga igapatigayon sa Pilipinas.
Ginkilala ang representante sang pungsod nga si Datu Al-Hakam Reggie Dimalanas 23 anyos kag halin sa Buluan, Maguindanao kun sa diin adbokisya sini ang Cultural minority empowerment kag pagpakilala sang kultura sang Maguinadanoan sa bug-os nga kalibutan.
Nahibaluan nga si Dimalana ang isa man ka advocate kag volunteer sa pagpromote sang edukasyon sa mga kabataan.
Kun mangin madinalag-on batuk sa 50 ka mga kasumpong, paga-usaron sini ang titulo agud iduso ang kalinong sa Autonomous Region in Muslim Mindanao pinaagi sa pag-ganyat sa mga kabataan nga ipakita kag ipabugal ang manggaranun nga kultura sang Muslim kag ipromote ang paghiliusa sa pihak sang nagkalain-lain nga prinsipyo kag pagtuo.
