KORONADAL CITY – Ginluthang patay ang isa ka lalaki samtang gina-usoy ang dalanon sang siyudad sang Tacurong alas-3:15 sang hapon kahapon samtang sakay sang iya nga baja 125 Kawasaki nga motorsiklo nga naga duag sang itom.
Ginkilala ang biktima kay alyas Ronnie kag residente sang Raja Buayan, Maguindanao.
Nahibaloan nga angkas pa sang biktima ang iya sini nga bata kag asawa sang nagluntad ang insidente.
Suno sa impormasyon nga ginapalab-ot sa Bombo Radyo Koronadal, padulong na kuntani ang pamilya sa ila nga puluy-an sang ginsundan sang wala nakilal-an nga riding in tandem.
Indi pa makuhaan sang nagakaigo impormasyon ang asawa sini bangud sa tuman nga kahadlok.
Nakuha sa crime scene ang 3 ka empty shell sang cal.45 nga armas.
Sa subong padayon pa ang imbestigasyon sang mga otoridad sa pagtumod sa mga suspek kag sa motibo sa pagpatay sa biktima.
