KORONADAL CITY– Patay ang 15- anyos nga estudyante matapos nga nalamita sa natabo nga engkwentro sa Brgy. Digal, Buluan, Maguindanao.
Ginkilala ang biktima nga si Muhalidin Haliday nga residente sang nasambit nga lugar.
Sa interbyu sang Bombo Radyo Korondal kay Lt. Col. Harold Cabunoc, 33rd Infantry Battalion commander, ginpahayag sini nga natabo ang engkwentro makaligad nga ginbalabagan sang riding in tandem ang tropa sang 62nd Division Reconnaissance Company samtang ginausoy sang ila nga salakyan ang Buluan, Maguindanao.
Bangud diri nakaangkon sang kambyuhanay sang lupok sa tunga sang militar kag armado nga kalalakihan kun diin nalamita ang nasambit nga estudyante.
Madasig naman nga gindala sa balay-bululngan sa siyudad sang Tacurong city ang biktima apang ginbawian sang kabuhi alas-11:00 kagab-i.
Naghatag naman sang bulig ang 62nd Division Reconnaissance Company sa pamilya sang biktima paagi sa pagbayad sang hospital bill kag 20,000 nga cash assistance.
Sa subong, nagapadayon ang hot pursuit operation sang mga otoridad sa mga suspek nga nakaengkwentro sang mga militar.
