KORONADAL CITY – Makaluluoy ang nadangtang sang isa ka ginang sa bahin sang Purok 6, Barangay Guiamalia sa banwa sang Esperanza Sultan Kudarat matapos nga magpanukot sang pautang, ginpatay kag ginlubong pa.
Sa esklusibo nga interbyu kay PCI Bryan Bernardino, ang chief of police sang Esperanza PNP, ginkilala ang napatay nga si Bebeng Salinto Mupac 36 anyos, may asawa kag residente sang Barangay Ilian sang nasambit nga banwa.
Base sa ginpatigayon nga imbestigasyon sang PNP SOCO, ginlubong sa indi man madalom nga buho nga gintabunan sang balas ang biktima kun diin nakit-an pa ang bala sa lawas sini.
Sa isa ka plantation oil nakutkutan ang biktima kun diin nasapwan man ang 5 empty shell 45 cal. nga amo ang ginaatihan nga gingamit sang mga suspek.
Suno sa utod sang biktima nanukot sang pautang sini sa Barangay Guiamalia ang biktima base sa iya ulihi nga text.
Samtang sa subong may lead na ang kapulisan sa mga suspek na ginatudlo sang nakakita sa bangkay sini.
Suno sa panaysayon sang mga nakakita, ulihi nga nakita ang biktima samtang sakay sang isa ka motorsiklo padulong sa lugar kun diin nasapwan ang bangkay sini.
Gilayon naman nga ginlubong ang bangkay sang biktima suno naman sa ila nga tradisyon sang Islam.
Samtang, ginapangita naman ang driver nga ginsakyan sini kag ang caretaker sang nasambit nga palm oil plantation kun diin ini nasapwan.
