KORONADAL CITY – Dako ang pagpasalamat sang mga himata sang 6 ka mga babaye nga gin-recruit gikan sa Mindanao nga nabiktima sang human trafficking matapos nga marescue sa Isabela at ligtas na nakauwi sa kani-kanilang pamilya.
Sa eksklusibo nga interbyu sang Bombo Radyo Koronadal kay alyas Amay, utod sang duha sa mga babaye nga na-rescue nga taga-South Cotabato, sa Bombo Radyo niya una nga nabatian ang balita sa natabo nga pagrescue sa iya mga utod sang Pebrero 21 kag nakumpirmar naman sang nakig-angot ini sa iya.
Suno kay Amay, siya mismo ang nagsugat sa mga utod sini kag upod sila nga nagpauli sa Tampakan, South Cotabato.
Madumduman nga naluwas sang mga otoridad sanday Regine, 24, residente sang Poblacion Columbio, Sultan Kudarat; Rona, 26; Kristine, 25 kag Jovelyn, yara sa husto nga edad nga lunsay mga residente sang Tampakan, South Cotabato; Lani, 24 kag Shaila, 23, lunsay mga residente sang Koronadal City nga nabiktima sang human trafficking kag pilit nga ginpatrabahi sa isa ka videoke bar sa Tumauini, Isabela.
Magaserbe naman nga leksiyon sa iya nga mga utod ang natabo kag indi na basta nga magsalig sa kakilala sa tion nga mag-aply sila abroad.
Madumduman nga ginpromisahan ang mga ini nga pagatudluan sang Nipongo agud nga amkapadulong sa Japan bangud sa mag-asawa nga sanday Hiro Hihumi Kawabata, 41, isa ka hapon kag ang asawa nga Pinay nga si Catherine, 38, lunsay mga residente sang Maruyama, Japan.
Natalana naman nga ipaidalom sa counselling sa MSWDO Tampakan ang duha ka mga utod ni Amay nga nakapauli na.
